A situación destes poboados responde a un patrón común, construídos en lugares elevados para poderen ter unha visión ampla do val. Tamén se podían observar entre eles.
O castro de Angrois está na parroquia de Sar, concretamente no outeiro que domina a aldea do mesmo nome. A elevación leva tamén o nome da aldea, monte de Angrois. Durante moito tempo, este outeiro foi aproveitado para os labores de gandería e agricultura. Na actualidade está abandonado e cuberto por vexetación silvestre que fai difícil a súa visita.
O castro de Vixoi está localizado no lugar do mesmo nome dentro da parroquia de Marrozos, concello de Santiago de Compostela. O conxunto arqueolóxico está situado nun outeiro de 200 metros de altura. A poucos metros desta elevación está o rego das Covas, nome que recibe aí o río Santa Lucía. Outro elemento de interese que pode axudar a localizar o castro de Vixoi é a capela de Santa Lucía. Este castro está poboado por castiñeiros e carballos polo que é fácil moverse por el malia o que se poden observar restos de muros e fosos no seu perímetro.
O castro do Croto da Susana está na parroquia de Marrozos, concretamente preto da aldea da Susana. É un conxunto histórico cun recinto central de forma elíptica. Ao redor hai unha serie de pendentes cunha altura máxima de 12 metros. Nas caras leste, oeste e sur existen reforzos para mellorar a defensa do lugar. No muro oriental hai unha porta xusto diante do foxo. Preto del hai un penedo de seixo coñecido como Pena Maior desde onde a rapazada vixiaba o gando que deixaba pacer nos prados do rego dos Ballotes, afluente do Santa Lucía.
