Danza e música tradicional
Galiza conta cunha rica tradición folclórica de cancións e danzas populares de orixe remota que teñen como fin o entretemento e a relación social entre as persoas participantes.
No concello de Santiago, son moitos os grupos e asociacións culturais que participan deste folclore. Na comarca que abarca o río Santa Lucía atopamos tres agrupacións: A.F. Coto da Nai (Aríns), Alborada (O Eixo), e A.C. Pena Maior (Marrozos) que dan idea da tradición e arraigo que este tipo de agrupacións teñen neste val.
Estes grupos comparten o compromiso da difusión da tradición galega, dedicando un importante traballo á promoción do baile e da música popular entre a mocidade de cada parroquia, por medio da escola de baile e música tradicional que imparten nos seus centros socioculturais, ademais de organizar e celebrar certames e foliadas para o gozo compartido.
A Asociación Cultural Pena Maior de Marrozos xurdiu dun grupo de mozas e mozos desta parroquia que, xa hai 30 anos, andaban na procura de iniciativas que incentivaran a cultura e o seu desenvolvemento, e a día de hoxe segue en activo. Conta con 70 socios e socias de diferentes idades, transmitindo e divulgando a tradición musical , a lingua e a cultura galega con outras agrupacións a través de intercambios culturais dos que sempre sae unha experiencia nova, o coñecemento doutras culturas, outros bailes, vestimentas e sobre todo unha nova amizade.
Non deixa de ser un grupo humilde, e ante todo amigos e amigas que se reúnen para pasalo ben e compartir o fermoso da nosa cultura, como é o baile e a música tradicional, tan chea de historia como de vida, xa que esta vocación vai pasando de xeración en xeración, converténdose nun importante legado no que todo o mundo espera con ansia o día de poderse vestir e gozar dunha boa foliada.
Os días grandes de Marrozos para poder participar nas foliadas e no baile tradicional son as festas patronais do mes de maio e agosto, o magosto e o terceiro sábado de xuño no que se celebra o Xesteiraso Folk, unha xuntanza anual na que se reúnen diferentes agrupacións folclóricas con cabida para todo o público e na que hai dende media tarde xogos populares para a xente máis cativa, certame folclórico, ralli de carretillas e photocall ao máis puro estilo “rural”, e, por suposto, servizo de bochinche (cantina e postos de comida) no campo da festa de Marrozos.
